GANGTE HOLY BIBLE THUSIM
(A hung piendawk dan)
Manipur Christian Synod ana kiti, tua Evangelical Synod Church kiti hin January 13-15, 1956 kum khan Gangte Holy Bible Translation Committee ana phutdawk ui. Zie a Member cheng chun Gangte Holy Bible mamawh thu uor takin ana gen chiet ui. Tichun, hun sawt hallo in, Pu Jamkhokam Gangte, Headmaster, Mission School chuh English Bible apat Gangte pau a lehdawk dingin kithuguol takin a guot ngal tau hi. Pu Jamkhokam Gangte chun zie chuh Pathien in sem dinga a guot ngei a ngaihtuoh in, kum thum sung taima taka a sep nungin 1971 kum in Holy Bible pumpi lehdawkna chuh a zo thieng tai.
Tichun, Gangte paua lehdawksa (manuscript) chuh Bible Society of India hetsak in abu a suk dinga pieklut ahi. Himahleh, vangsiet um takin Bible Society of India danlemuolte sukbutit theihloh ziekin Committee kinep bangin apiting thei ta puoi. Asim ding mi a tawm hi tih leh Bible zawkna ding (market neuh) suonlam in Bible suk ding ana phal puou hi.
Tichun, hun hung chieh zelin Committee chun Pu Suonkholal Thangjom, Chairman hihna leh Rev. K. Thuomngell, Secretary leh member tamlocha tawh Gangte Holy Bible ei suksak nuom a um thei em ti a hawl zawm zel ahi. Tichun, Trinitarian Bible Society chuh Gangte Holy Bible sudawk dinga hopih ahi. Ahihziek in, Trinitarian Bible Society hin Pu Jamkhokam in ana lehdawk hi King James Version ahihloh ziekin a sudawk nuom ta puou hi.
Khutichun, Bible lehdawkna chu abula patthak dingin a hung um tai. Tichun, atum nihna dingin Rev. K. Thuomngell tawh Rev. Sawngthang, Chairman leh Secretary makaih in King James Version lehdawkna chuh pat ahi kit hi. Bible lehdawk chuh zawh ahih nungin Trinitarian Bible Society ah sukdinga pieklut ahi. Pieklut ahih nungin Trinitarian Bible Society chun Thuthun Thak chauh sut masak dingin lem a sau a. Himahleh, Committee chun Thuthun Thak, 1959 a kisudawk ahih tak ziekin Thuthun Thak chauh suk ding thu chuh pha ana sa puou hi. Bible suk ding thu ahin Bibles for the World le hopih ahi a, mahleh alem thei diek puoi. Tichun, Gangte Holy Bible suk ding thu chuh anihveina dingin suktawp ahi kit tai.
Gangte Holy Bible thusim hi Pastor T.M. Thangzalien Gangte malakna gen khalo in bukim lo ding ahi. Amah hi 1984 kum khan a felna ziekin BSI Shillong Auxiliary nuoi ah Distribution Promotor dinga tel ana hi. A sepna gam haw chuh Manipur, Nagaland, Assam leh Meghalaya ahi a, a nasep pen chuh a chunga gam (state) li haw ahih Thuthun Thak leh Bible chuom chuom atam thei pena hawpdawk ding tih ahi. Pastor Thangzalien hin BSI Shillong Auxiliary nuoia Distribution Promotor a sep zing lai chun Gangte’n Holy Bible neih nailoh chuh a lungthim ah a chamzing hi. Zie hun haksa tak lak achun BSI Mini Budget Session, Calcutta a neih ding ti’n ahun guonggalh ui. Pathien lemguot hintin, Pastor Thangzalien le zie a Budget session a tel ding chun chiel in a um hi. Chuleh, zie budget session achun gamchuom chuoma Bible Translation a Secretary cheng le a tel ui. Tichun, ni khat chuh nituma pauchamna nei in, Pastor Thangzalien chun Gangte Holy Bible suk ding thu chuh agenda dingin a pie lut tai. Himahleh, zie thu chuh memberte chun ngaihsak lo in, a kihetmawhsak ui. Zie a member laka khat, Rev. Achumi vang chun khauh takin a dal a, “Gangte mi tawmchah a dingin Holy Bible suk theih hi puo’n a,” ahun ti a. Ziephet chun, Pastor Thangzalien chun, “Gangte hi Manipur chauh ale, 15,000 (sang sawmlenga) val um ahi a, kei Gangte ka hi a, Gangte tawm leh tam chuh ken ka he zaw puoh dem,” ti’n Rev. Achumi thugen chuh a niel dawng kei tai. Atawp chun, Pastor Thangzalien in Gangte Holy Bible suk ding thu dettaka a dinpih ziek chun memberte chule thuzawh in a um ua, Gangte Holy Bible suk ding chuh Project a telsak ding lem ahun sa tau hi. Zie meeting chuh ahung kichai a, Rev. Achumi chun, ‘Pastor, tu chun na kipak ta?” ti’n a kipahpih thu Pastor Thangzalien kawmah avak gen zaw bawn hi.
Tichun, hun a chieh zel a, Calcutta a budget session a thupass chuh Gangte Holy Bible Committee chun ahun he tau hi. Holy Bible suktheihna ding malama kinepna lientak ahung um phat chun, Committee memberte chuh guntaka chukhawm in, zie hun laitaka Executive Secretary, Rev. Khaigin Gangte chuh Holy Bible Translator dingin a guot ngal tau hi.
Atawpna dingin, 1986 kum a hung tawp chun, Rev. Khaigin Gangte chun kithalawp tak mai in, Holy Bible chuh Gangte pau in a hun letdawk pan tai. 1987 kumtawp lam, September 19-24, 1987 sungin Chiengkonpang ah Translation workshop neih ahi a, Dr. John Phillipose, General Secretary, BSI; Rev. Achumi, Secretary, Translation, Dimapur leh Rev. Hinewtta, Secretary, Translation, Shillong a hungtel ziekun zie hun hi tiemteh tak khat ahi. Zie a Translation Workshop a nasep ding dan leh sinsakna haw apat in Gangte Holy Bible zawh fel leh sukdawk ahung hi tai.
Gangte Holy Bible chuh akhatveina ah bu 5000 (sangnga) suk ahi a, Rev. Benjamin Rai, Translation Director chun Gangte mipi Bible mamawh tak maite chun kumsawt Hinna a muh theihna ding ua, a sim theih dingun March 1, 1991 in Pathien mina hlat thiengthona leh hawndawkna a nei tai.
